Wednesday, July 8, 2009

"Tribute to MJ"

"Smile Even When Your Heart is aching...."

"Tribute to MJ"

Wednesday, June 24, 2009

Songulun molohing kusai id kakadaian...

Ie nopo ontok toun 2006, nokopimpanau oku hilod kakadaian do Megah Ria, Johor Bahru. Masoh nopodi nga minoi oku pomoli kuui id iso kadai.

Id tindalanon ku kumaa hilod kadai di, nokito ku songulun molohing kusai poingrikau id disan di kakadaian. Rasuk dau opurak natalup talup noh, sorual dauh oniba irih kadau nga natalup om oromos kokitanan. Poingkibit dau polositik kisuang mogisusuai poh, haroh tin-tin tinumon (ie amu noh kisuang), haroh karatas, haroh gata gata, butul polositik. Id sampaping di nirikau dau haroh iso karung opurak.

Potilombusoh ku pamanahon ku. Soira kobolih ku ie bolion ku om minuli oku hirid niyonon ku.
Korikot okud hirid niyonon ku kokito ku id molohing kusai di poingrikau yauh id timpak watu okoroh, poinsaan dauh ie karung (ukam nunu suang). Poiliho dau ie karung hirid toning dau, om pakadada yauh miagal anaruh kopioh pomusarahan. Kosisian kopioh kokitanan ku dau.

Tadau tadau di tumalib kakal kupoh okito yauh mimpanau minsalayag hirid kakadayan miampai rasuh om sorual dauh ie amu notingalanan.

Nokoumbal oku nokoturu romou mato kokito nasip dauh, miagal
tulun di aiso walai ulion, miagal tulun di aisoh paganakan rikoton. Opihak tian dau, agahui. Muhot nogi ginawo ku, isai molohing dilo? nombo walai dau? nakaakan noh kaka yauh?

Om iti toun 2009, insan poh kaagu nakawaya oku hilod Megah Ria, om kakal kupoh okito molohing kusai dirih. Rasuk om sorual dauh kakal poh amu notingalanan... :-(

Sundung potuu amu oku kotutun molohing kusai dilo, nga oruol ginawo ku, koihad ginawo ku, kosorou nasip dau.

Osorour ku nogi molohing ku sondiri ie asaru kud otongkiadan mamanau id sodu. Om kopomusorou oku nogi, poingkuroh ma doho koposion soira molohing oku??

unduk ngadau

"Norikot nodi bulan 5, kapanandaakan tadau tagayou..." Nung isai isai uhoton tokou sinding dilo otumbayaan oku koisanan dati oubas korongou sinding dilo kio.

Soira nopo orikot bulan 5, mangaramai tokou nodi Tadau Kaamatan tanda do kounsikahan di manananom parai, tadau tagayo do tulun tokou Kadazan-Dusun. Montok di topinai id sodu, bulan 5 noh timpuu diolo do muli id kampung sumolowot molohing om topinai ngawi, on hiloh noh 'aramaiti sampai pagi, esok pagi, lusa, tulat..." kadi boros Ma

Karamayan Kaamatan amu avasi nung aisoh ie komoyon Unduk Ngadau kadi. Yoho nopo sondiri, ontok bulan 5 mintong oku nopo surat kabar nga poguluonon kupoh mintong ie haroh gambar kosumandakan Unduk Ngadau. Okon ko nunu nga, siilo dum isai nakalantoi unduk ngadau... :-)

Nga baino om ie piroh piroh toun nakatalib, ogumu ie okon ko tulun Kadazan- Dusun minoi amung om tumanud nogi id pialaan do Unduk Ngadau. Koumbal nogi muhot ginawo ku, nokuroh tu okonko tulun tokou nopo obulih tumanud di pialaan Unduk ngadau. Mogisusuai podi bangsa obuli mampai diti unduk ngadau baino.

Ie nopodi 'simbolik' Hominudon id unduk ngadau nga miagal ogumu tulun amu karati nunu kopio komoyon toiko rati id saralom pialaan unduk ngadau dirih.Asanangan oku daa yoku di tulun kadazan dusun 100% toiko ori nopo obulih tumanud dilo pialaan unduk ngadau oi..
Kaagu om ogumu poh tulun tokou do lobih olumis om berhak boh...

Nga nunu gia hak kud mimboros miagal diti id tanga ginumuan tulun kio?

Poingkuroh poh nga alansan oku potilombus nodaa iti pisompuruan tokou tulun Sabah sundung potuu do id nombo tokou nopo.

Kotobian tadau tagayo do kaamatan.

Friday, June 19, 2009

Songulun e Oupus Dikah...


Songulun e otopot kopio mongupus dika auh miloh manahak sabap nokuroh tu oupus yauh dikah. Nunu e oilaan dauh id ginawo om mato dauh nopoh nga haroh ika noh songulun.



Songulun e otopot kopio mongupus dikah kaanu monorimo dikah miampai awi ginawo, id mato dauh ika noh e talawa sundung potuh opurimanan nu nakatambah winagat tinan nu.


Songulun e otopot kopio mongupus dikah papatod do ‘SMS’ miagal ko ‘osonong kosuabon’, osonong tadau minggu’, ‘osonong totuong’, om mogisusuai poh... sundung potuu do amu nu insan simbaro SMS dau, sabap SMS dilo popoungkap songkuroh rinalom tupus dau.


Songulun e otopot kopio mongupus dika kosorou kasasari dikah om sontob nunu e nawayaan dikoyu ngoduo, om nogi e kinaantakan-kinaantakan di iyah sondiri nga nolingan nunoh, sabap timpu-timpu dilo agayoh kopioh rati montok dauh, om masoh dilo koturu romou matoh dauh sabap sontob e nawayaan-nawayaan dikoyu amu nodi koguli kawagu id koposion dauh...

Thursday, June 18, 2009

Id kampung ku...


Iti noh kinoiyonon yah id Ranau...

Paling 'aramaiti' :-)
"Welcome to Ranau"

Wednesday, June 17, 2009

Pawanatai Sakaian

Odoi ku loh sakaian ku! Wahai kenderaanku

Tanak e yondau noolong Anak si mondou lah tidur
Riau i-yontis modtulud Bunyi montis apabila terbang
Songkoriau do sakaian Demikian bunyi kenaikan ku

Kowoiyo ko di winantai Mengikut dikau di bawa pergi
E winantai ku e unduk-unduk Dibawa pergi kenderaanku
E unduk-unduk di awan Kenaikan di kayangan
Ngoyon ku runduk di Pangasakan Pergi ke hujungnya muru-puru

Morid sinawa Datang keluar
Sawa ku e Lumaag Keluar dari Lumaag
Sawa ku kurilib Keluar dari selendangku
Sawa konoh diwatoh ` Keluar lah Diwatoh
Sawa hiti pamantai Keluar dari tempat dibawa pergi
Sawa konoh sunduan Keluarlah sunduan

Hiti salungan Inilah salungan
Powoyoo ku nantangan Mataku mengikuti mereka


mantad buuk: Dusun, Arenawati (1974)

pomusarahai...


Ontok tadau baino, yoku om songulun tambalut minongoi pomoli-moli barang id iso kadai. Koubasanan tokou nopo, soira momoli ogumu-gumu nga asanangan tokou migit d komoyon 'troli' tu amu dino awagatan longon mikahang-kahang di toboli tokou.
Ingkaa nogi yoku duo tambalut ku...
kosiap di momolih-molih, kabarayai, om ka'a minoi sakai kerita. Kosuang di ngawi barang2 hirid kerita om pindisan-disano ku nopo e 'troli' hirid disan do paking kerita, amu ndoh gia osonong dot songkowilihan nopo hirid tanga-tanga pokingan do kerita tu korumot do tulun suai. Nga suai potih tambalut songulun tu, kosuang dau hirid kerita ie barang2 dauh om tongkiadai nopo di ie 'troli' hirid tanga-tanga 'parking'. (Nunu opurimanan dikoyu sendiri nung kobontol kou haroh songingantob di masa'an dikoyu mara-arau?).
Okon nogi koh haroh panasalan di ambalut di sinongkowilihan dau di 'troli' nga mingirak nogi tomod miampai minimboros "kotoh nogi da loh doho 'troli' tinu di, kotoh noh daa ie moi parking do hilo tinu, a'antaban... kada koti ranggalo loh 'troli' ku d tinu", kaa dau minomoros doho miampai tirak di ologod kopioh.
Yauh nopo tu amu nokoumbal papanau kerita nga amu kantoh koilo nunu topurimanan di tulun suai soira kobontol irad dilo.
Sundung potuu miagal okoroh ilo hal dilo okito tokou nga, soira pomusarahan tokou kawagu auh ie da apatut konnn....?

Tuesday, June 16, 2009

Yoku noh Iti...

Yoku, tanak di ama om apa :-), tulun Dusun mantad Ranau, Sabah, kinoiyonon di olumis kopio doiti pomogunan nointutunan ku. Tadau baino, tininmpu'unan ku ti komoyon 'blog' id boros Dusun. Om alansan daa do isai-isai e karati boros Dusun manahak doho do sokodung id suang do komen-komen dikoyu. Kounsikahan!!